Новости - пресс-релизы

Напісаць апавяданне пра Мінск і трапіць у адзін зборнік са знакамітымі беларускімі аўтарамі. Рэальна? Так!

Літаратурны конкурс «10 + 10: Мінск» ад фестывалю «Горад і Кнігі» аб’яднае беларускіх пісьменнікаў і ўсіх, хто любіць горад Мінск.

У 2018 годзе фестываль "Горад і Кнігі" пройдзе 18-19 траўня, але далучыцца да яго можна ўжо зараз. Арганізатары абвясцілі літаратурны конкурс апавяданняў пра Мінск -- на беларускай мове. Творы канкурсантаў-пераможцаў увойдуць у зборнік побач з тэкстамі знакамітых беларускіх аўтараў. Наша мэта: заахвочванне і падтрымка літаратурнай творчасці маладых людзей Беларусі, папулярызацыя чытання, нацыянальнай мовы і літаратуры.

Як нарадзіўся спецпраект «10+10»?

Арганізатары папрасілі 10 знакавых пісьменнікаў напісаць апавяданне на пэўную тэму -- Мінск. Сярод аўтараў, якія ўвойдуць у зборнік – Людміла Рублеўская, Міхаіл Валодзін, Адам Глобус, Раіса Баравікова, Ганна Севярынец, Маргарыта Латышкевіч, Андрэй Жвалеўскі і Яўгенія Пастэрнак, Надзея Ясмінска, Алена Мальчэўская і Уладзімір Садоўскі.

 Усё, чаго не хапае, гэта яшчэ 10 апавяданняў ад аўтараў-навічкоў.

Да 1 сакавіка на конкурс прымаюцца празаічныя творы, раней нідзе не апублікаваныя, аб’ёмам да 12.000 знакаў. Тэма твораў – Мінск (ва ўсіх яго праявах). Мова конкурсу – беларуская. Удзельнікам можа стаць любы грамадзянін Беларусі ва ўзросце 18-30 гадоў. Лепшыя творы – для публікацыі ў зборніку – будуць абраныя прафесійным журы, у склад якога увойдуць арганізатары конкурсу.

Зборнік будзе прэзентаваны на фестывале 18-19 траўня. Частка накладу будзе падорана бібліятэкам краіны. Апавяданні пераможцаў таксама будуць надрукаваныя ў часопісе "Маладосць". А творы аўтараў з першай дзесяткі можна будзе прачытаць на старонках выданняў партнёраў праекта яшчэ да выхаду зборніка.

Арганізатары спецпраекта “10+10”: фестываль “Горад і Кнігі” і часопіс “Маладосць”. Пры падтрымцы выдавецтва “Янушкевіч” і фонда “Вяртанне”.

Больш падрабязна пра конкурсныя ўмовы можна даведацца на сайце фестывалю: http://bookfest.by/10_10

ПРА ФЭСТ:

"Горад і Кнігі" - гэта ўнікальная кніжная падзея Беларусі, арганізаваная сіламі валанцёраў, закаханых у кнігі. Тры гады фэст актыўна набіраў абароты, абрастаў новымі праектамі і наведвальнікамі. За гэты час у яго рамках прайшло больш за 300 кніжных і літаратурных мерапрыемстваў, якія наведала больш за 16 000 чалавек.

вернуться